Free songs

Deen-e-Kamil Aur Sahaba Ka Nazriya

Deen-e-Kamil Aur Sahaba Ka Nazriya

Allah Ney Quran-e-Majeed Ki Surah Almaida Ki Ayat Number 3 Mein Irshad Farmaya:

الیوم اکملت لکم دینکم (Aaj Maine Tumhare Liye Tumhara Deen Kamil Kar Diya).

Is Ayat Ko Base Bana Kai Baaz Log Tarha Tarha Ki Batain Kartey Hain…

Aeiye… Aaj Jaiza Letay Hain, Kai … Deen Mukammal Ho Gaya… Is Ka Kia Matlab Hai?

Kuchh Logon Ne Samjha Kai Deen Mukammal Hone Ka Matlab Yeh Hai Kai…

Ab Koi Bhi Naya Kaam Nahi Kiya Ja Sakta…

Kia Yeh Baat Sahi Hai?…

Agar Yeh Baat Sahi Hai To Sahaba-e-Kiraam Ney Bohot Sey Aesay “Naey Kaam” Kiye Hain, Jin Kai Karne Ka Naa Allah Ney Hukm Diya Aur Naa Hi Allah Kai Rasool ﷺ Ney…

Aesay Bohot Sey “Naey Kaam” Hain Jo Sahaba-e-Kiraam Ney Apni Marzi Sey Kiye…

Kia Unko Nahi Pata Tha Kai Deen Mukammal Ho Gaya Hai?

Agar Unko Pata Tha… Aur Beshak Unhain Pata Tha To Phir Woh Deen Mukammal Hone Kai Baad “Naey Kaam” Kiyon Karte They?

Kia Unhen Deen Mukammal Hone Kai Baad Bhi Deen Mein Izafay Karne Ki Ijazat Hasil Thi?

Aesa Bhi Nahi Ho Sakta Kai Unhen “Deen Mein Izafay” Ki Ijazat Hasil Ho…

Kyon Kai Deen To Nabi Pak ﷺ Per Mukammal Hua Tha, Kisi Or Ko Us “Kamil Deen” Mein Izafay Ki Ijazat Kaisay Mil Sakti Hai?

Phir Aakhir Kia Baat Thi?…

Kia Waja Thi Kai Sahaba-e-Kiraam Ney “Naey Naey Kaam” Kiye, Aur Kisi Sahabi Ney Bhi Mana Nahi Kiya, Aur Kisi Sahabi Ney Bhi Aetiraaz Nahi Kiya…

Baat Yeh Thi Kai…

Sahaba-e-Kiraam Deen Ki Rooh Ko Samajhte They, Woh Barah-e-Raast Nabi-e-Pak ﷺ Se Taleem Hasil Karte They, Woh “Deen Mukammal Hone Ka Sahi Matlab Jante Thay”…

Deen Mukaam Honey Ka Sahi Matlab Kia Hai?

Is Barey Mein “Mufassireen-e-Kiraam” Kai Kaei Aqwaal Hain…

  1. Halal-O-Haram Kai Ahkaam Aur Qiyas Kai Qanoon Sub Mukammal Kar Diye Gaey, Isi Liye Is Ayat Kai Nuzool Kai Baad Halal-O-Haram Kai Bayan Per Mushtamil Koi Ayat Nazil Nahi Hui.
  2. Takmeel-e-Deen Ka Aik Matlab Yeh Hai Kai Islam Ko Ghalba Ata Kar Diya Gaya Hai.
  3. Aik Muraad Yeh Hai Kai Yeh Deen-e-Islam Pichhli Shariaton Ki Tarha Mansookh Nahi Hoga, Balkay Qiyamat Tak Baqi Rahey Ga.

Jee Haan!

Deen Mukammal Hone Ka Yehi Matlab Hai… Kai

Yeh Deen Pichhli Shariaton Ki Tarha Mansookh Nahi Hoga, Balkay Qiyamat Tak Kai Liye Qabil-e-Amal Rahey Ga, Aur Halal-O-Haram Kai Tamaam Ahkaam-O-Qawaneen Mukammal Kar Diye Gaey Hain, Aur Islam Ko Ghalba Ata Kar Diya Gaya Hai.

Sahaba-e-Kiraam Ka Yehi Nazariya Tha, Who Jaantey Thay Kai Deen Mukammal Hone Kai Baad Kisi Bhi Kaam Ko Apni Marzi Sey Haram Nahi Kaha Ja Sakta, Kyon Kai Halal-O-Haram Kai Ahkam Aur Un Kai Qawaneen Allah Kamil Tor Per Bayan Farma Chuka…

Ab Agar Koi Naya Kaam Bhi Shuru Kiya Jaey To Woh Mehez Naya Honey Ki Waja Se Haram Nahi Kaha Jaa Sakta, Balkay Agar Woh Allah Kai Ata Karda Kamil Deen Mein Haram Hai Tub Hi Haram Kehlaey Ga Warna Nahi, Kyon Kai Deen Mukammal Ho Gaya… Yani Halal-O-Haram Kai Ahkaam Aur Un Kai Qawaneen Kamil Tor Per Bayan Farma Diye Gaey Hain.

Is Baat Sey Unhen “Dars-e-Ibrat” Hasil Karna Chahiye Jo Baat Baat Per Haram Kai Fatway Laga Detay Hain…

Yaad Rakhiye!

Deen Kamil Ho Chuka Hai, Halal-O-Haram Kai Ahkam-O-Qawaneen Bayan Kiye Jaa Chukay Hain, Lehaza Ab Kisi Bhi Kaam Ko Mehez Naya Honey Ki Bina Per Haram Nahi Kaha Jaa Sakta…

Balkay!

Us Naey Kaam Ko Deen Per Pesh Kiya Jaey Ga, Agar Deen-e-Islam Us Kaam Ki Taeed Karey To Woh Bila-Shuba Jaiz Hai…

Yaqeenan, Aap Sochain Gay Kai Maine Kaei Bar Is Baat Ka Zikr Kiya Kai Sahaba-e-Kiraam Ney Kaei Naey Kaam Apni Marzi Sey Kiye… To Aakhir Woh Konsey Kaam They…?

To Suniye,

1.     Sahi Bukhari Mein Hai:

Quran Ko Aik Mushaf Mein Hazrat Abu-Bakar Siddique Ney Rasool-Ulllah ﷺ Kai Wisaal Kai Baad Jama Kiya…

Jub Kai Quran Ko Aik Mushaf Mein Jama Karna Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺ Ki Sunnat Mein…

2.     Sahi Muslim Mein Hai:

Hazrat Bilal Wuzu Karne Kai Baad Pabandi Sey 2 Rakat Namaz Nafil Parhtey They…

Jub Kai Wuzu Kai Baad Pabandi Sey 2 Rakat Namaz Parhna Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺ Ki Sunnat Mein…

3.     Tirmizi Mein Hai:

Aik Sahabi Masjid-e-Quba Mein Namaz Parhatey They, Namaz Mein Jub Koi Surah Parhtey To Us Sey Pehle Surah-Ikhlaas Zaroor Parhtey They…

Jub Kai Aesa Karna Yaqeenan Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺKi Sunnat Mein…

4.     Sahi Bukhari Mein Hai:

Aik Sahabi Ney Sooli Per Charhney Sey Pehle 2 Rakat Nafil Parhi…

Jub Kai Aesa Karna Bhi Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺ Ki Sunnat Mein…

5.     Sahi Bukhari Mein Hai:

Hazrat Usman-e-Ghani Ney Jumey Mein 2 Azanain Dilwaney Ka Tareeqa Shuru Kiya…

Jub Kai Yeh Bhi Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺ Ki Sunnat Mein…

6.    Hazrat Usman-e-Ghani Kai Dour Mein Eid-Gaah Mein Eint Aur Mitti Sey Mimbar Tayyar Kiya Gaya Aur Hazrat Usman-e-Ghani Ney Us Mimbar Per Eid Ka Khutba Parha…

Jub Kai Eid-Gaah Mein Eint Aur Mitti Ka Mimbar Banwa Kar Us Per Khutba Parhna Bhi Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺKi Sunnat Mein…

7.     Hazrat Ali Ney Aik Hi Sheher Mein Namaz-e-Eid Kai 2 Ijtemaat Shuru Kiye…

Yeh Jaantey Huey Bhi Kai Yeh Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺKi Sunnat Mein…

8.     Sahabi Hazrat Abdullah Bin Masood Ney Wa’z-O-Naseehat Kai Liye Jumeraat Ka Din Mutayyan Kiya…

Jub Kai Jumeraat Kai Wa’z-O-Naseehat Kai Liye Kisi Bhi Din Ko Khaas Karna Yaqeenan Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺKi Sunnat Mein…

9.     Sahi Bukhari Mein Hai:

Aik Sahabi Raat Bhar Qiyaam Kartey Aur Surah-Ikhlaas Parhtey Parhtey Subah Kar Detay…

Kia Rasool-Ullah ﷺ Aesa Kartey They? Jee Nahi… Yeh Bhi Naya Kaam Tha, Aur Is Kaam Ka Na Quran Mein Hukm Tha Na Allah Kai Nabi ﷺ Ki Sunnat Mein…

Sahaba-e-Kiraam Kai Tarz-e-Amal Sey Maloom Hua Kai Un Ka Nazariya Yehi Tha Kai Koi Bhi Kaam Mehez Naya Honey Ki Bina Per Na-Jaiz Nahi Ho Sakta, Han Magar! Allah Ka Deen Us Kaam Sey Mana Karay To Yaqeenan Aesa Naya Kaam Gumhrahi Hai.

Her Woh Naya Kaam Jis Ki Deen Mein Mumaniat Ho, Ya Woh Naya Kaam Jo Deen Kai Khilaaf Ho To Yaqeenan Aesay Naey Kaam Say Bachna Zaroori Hai, Aesay Hi Naey Kamon Kai Barey Main Allah Kai Nabi Ney ﷺ Farmay:

Jis Ne Hamare Is Deen Mein Koi Aesa Naya Kaam Eijaad Kiya Jo Is Say Nahi (Yani Deen Kai Khilaaf Hai), To Woh Naya Kaam Mardood Hai.

Baqi Woh Naey Kaam Jo Agarchay Baad Mein Eijad Huey, Lekin Deen Kai Khilaaf Nahi, Un Naey Kaamon Ki To Allah Kai Nabi ﷺNey Khud Hosla-Afzaei Farmaei Hai.

Sahi Muslim Mein Hai:

Allah Kai Nabi ﷺ Ney Farmaya…

Jis Ney Islam Mein Koi “Achha” Tareeqa Shuru Kiya, Usay Is Achhay Tareeqay Ki Ibtida Ka Ajar Milay Ga, Aur Un Tamam Logon Ka Ajar Bhi Isay Milay Ga Jo Us Kai Baad Is Naey Achhay Tareeqay Per Amal Karain Gay, Baghair Is Kai Key Un Logon Kai Ajar Mein Kisi Qisam Ki Kami Ho (Yani Ibtida Karne Wale Aur Baad Mein Amal Karne Wale, Dono Ko Pura Pura Sawab Milay Ga).

Aur Jis Ney Islam Mein Koi “Bura” Tareeqa Shuru Kiya, Usay Is Burey Tareeqay Ki Ibtida Ka Gunah Milay Ga, Aur Un Tamam Logon Ka Gunah Bhi Isay Milay Ga Jo Us Kai Baad Is Naey Burey Tareeqay Per Amal Karain Gay, Baghair Is Kai Key Un Logon Kai Gunah Mein Kisi Qisam Ki Kami Ho (Yani Ibtida Karne Wale Aur Baad Mein Amal Karne Wale, Dono Ko Pura Pura Gunah Milay Ga).

Allah Hamain Sahaba-e-Kiraam Kai Tareeqay Per Chalney Ki Taufeeq Ata Farmaey, Aur Bad-Aqeeda Logon Ki Suhbat Sey Door Rakhay.

Leave a Reply

Islamic Books Library

Islamic Books Library - In The Memory of Quid-e-Ahl-e-Sunnat Hazrat Allama Imam Shah Ahmed Noorani Siddiqui (Late). Thousand of Islamic books, booklets, articles of many renowned Islamic scholars on more than hundred different topics in top languages of the world.